明觉杂志

廣告 Close Ad
2020佛学研究文学硕士-AD

龕场入侵禅林 鹿湖佛都有火

东方日报   A30 | 港闻 | 功夫茶| 2010-09-09
唔讲大家可能未必知,原来香港有一个风光如画嘅地方叫做鹿湖,而鹿湖又系佛门清净地,灵气相当逼人。以前呢,唔系咁多人听过位处大屿山嘅鹿湖,更加唔系咁多人长途跋涉拜会过,之但系,家阵应该比较出名嘞,事关令到香港人极之困扰嘅骨灰龕问题搞到鹿湖佛都有火!
 
呢嗱,就咁,特区政府长期放任不管吖嘛,官方骨灰龕位一直严重供不应求,孝子贤孙往往要轮候三五七年先至能够为先人安排葬身之所,咁咪造就私营骨灰龕场绞尽脑汁大发死人财啰。所谓私营骨灰龕场,有部分系正正经经嘅庙宇道场,有部分系简简陋陋嘅荒山野岭,共通点系四个字:无牌营业。换句说话嚟讲,万一孝子贤孙帮衬咗无牌龕场而又遇着政府扫场,咁就真系做鬼都要走鬼,祖宗十八代迫迁移民,大吉利是咯!
 
好嘞,既然私营骨灰龕场有利可图,而且系暴利嗰只,龕位以呎价计随时贵过半山豪宅,一向以蛊惑见称嘅香港人梗系跟风㗎啦,卒之连佛门清净地都唔放过,鹿湖成为最新一个受害者。当地佛教修行者好不满咁话,现有商业集团试图将鹿湖一带经营成「骨灰龕林」牟利,除咗四出收购大兴土木之外,经营方式更加涉嫌违反土地契约,霸占荒弃私人土地以及破坏水源,严重影响附近一带嘅生态环境,对僧众嘅静修生活造成极大干扰,破坏鹿湖静修禅林文化。佛门中人当头棒喝发出沉重呼吁,古老禅林面临重大威胁,令人心痛不已,亟需各方有心人士拯救及保护!
 
嗱嗱嗱,你话死唔死?当地历史最悠久嘅鹿湖精舍已有近一百三十年历史,自成一隅,与世无争,谁不知就因为政府长期漠视骨灰龕位问题而受到威胁,原本灵气逼人一个唔觉意就会沦为乌烟瘴气。所以话啫,官场惰性好多时候累人累物累街坊,生难养时死难葬,凡人固然受害,神佛同样遭殃!
 
当然啦,骨灰龕场系要兴建嘅,否则人人百年归老之后统统变晒游魂野鬼,问题系唔可以眯埋眼乱咁嚟,如果灵修禅林都容许肆无忌惮入侵,唔通礼宾府隔篱又可以任人开设骨灰龕场烧衣祭祖咯喎?本来政府都话过要好好规划嘅,仲话「十八区都要有骨灰龕场」添,点不知又系讲一套做一套。
 
食物及衞生局提出十二个龕场建议,包括将现有钻石山灵灰安置所扩建。黄大仙区议会基本上唔反对,只系担心扫墓期间忽然人头涌涌塞爆问题啫,所以向政府要求喺每年春秋二祭借用邻近学校地方畀孝子贤孙泊车。哈,你估下官老爷有乜嘢反应吖嗱?教育局一句就话唔得,否决理由系当局唔会动用公帑为非学校活动购买保险。
 
唉,功夫茶虽然唔系得道高僧,冇办法未卜先知,不过都可以预见一个相当诡异嘅场面:孝子贤孙抬棺材抗议,鹿湖僧侣敲木鱼示威。好心官老爷唔好咁懒啦,好好諗办法解决问题,政府总部唔系骨灰龕场,唔可以放置大量死人头㗎!
 
标签 :
分类 :
评论 :
    回覆 :
    姓名 : *
    内容 : *
    验证码 : *
    分享到