明覺專稿

龕場入侵禪林 鹿湖佛都有火

東方日報   A30 | 港聞 | 功夫茶| 2010-09-09
唔講大家可能未必知,原來香港有一個風光如畫嘅地方叫做鹿湖,而鹿湖又係佛門清淨地,靈氣相當逼人。以前呢,唔係咁多人聽過位處大嶼山嘅鹿湖,更加唔係咁多人長途跋涉拜會過,之但係,家陣應該比較出名嘞,事關令到香港人極之困擾嘅骨灰龕問題搞到鹿湖佛都有火!
 
呢嗱,就咁,特區政府長期放任不管吖嘛,官方骨灰龕位一直嚴重供不應求,孝子賢孫往往要輪候三五七年先至能夠為先人安排葬身之所,咁咪造就私營骨灰龕場絞盡腦汁大發死人財囉。所謂私營骨灰龕場,有部分係正正經經嘅廟宇道場,有部分係簡簡陋陋嘅荒山野嶺,共通點係四個字:無牌營業。換句說話嚟講,萬一孝子賢孫幫襯咗無牌龕場而又遇着政府掃場,咁就真係做鬼都要走鬼,祖宗十八代迫遷移民,大吉利是咯!
 
好嘞,既然私營骨灰龕場有利可圖,而且係暴利嗰隻,龕位以呎價計隨時貴過半山豪宅,一向以蠱惑見稱嘅香港人梗係跟風㗎啦,卒之連佛門清淨地都唔放過,鹿湖成為最新一個受害者。當地佛教修行者好不滿咁話,現有商業集團試圖將鹿湖一帶經營成「骨灰龕林」牟利,除咗四出收購大興土木之外,經營方式更加涉嫌違反土地契約,霸佔荒棄私人土地以及破壞水源,嚴重影響附近一帶嘅生態環境,對僧眾嘅靜修生活造成極大干擾,破壞鹿湖靜修禪林文化。佛門中人當頭棒喝發出沉重呼籲,古老禪林面臨重大威脅,令人心痛不已,亟需各方有心人士拯救及保護!
 
嗱嗱嗱,你話死唔死?當地歷史最悠久嘅鹿湖精舍已有近一百三十年歷史,自成一隅,與世無爭,誰不知就因為政府長期漠視骨灰龕位問題而受到威脅,原本靈氣逼人一個唔覺意就會淪為烏煙瘴氣。所以話啫,官場惰性好多時候累人累物累街坊,生難養時死難葬,凡人固然受害,神佛同樣遭殃!
 
當然啦,骨灰龕場係要興建嘅,否則人人百年歸老之後統統變晒游魂野鬼,問題係唔可以瞇埋眼亂咁嚟,如果靈修禪林都容許肆無忌憚入侵,唔通禮賓府隔籬又可以任人開設骨灰龕場燒衣祭祖咯喎?本來政府都話過要好好規劃嘅,仲話「十八區都要有骨灰龕場」添,點不知又係講一套做一套。
 
食物及衞生局提出十二個龕場建議,包括將現有鑽石山靈灰安置所擴建。黃大仙區議會基本上唔反對,只係擔心掃墓期間忽然人頭湧湧塞爆問題啫,所以向政府要求喺每年春秋二祭借用鄰近學校地方畀孝子賢孫泊車。哈,你估下官老爺有乜嘢反應吖嗱?教育局一句就話唔得,否決理由係當局唔會動用公帑為非學校活動購買保險。
 
唉,功夫茶雖然唔係得道高僧,冇辦法未卜先知,不過都可以預見一個相當詭異嘅場面:孝子賢孫抬棺材抗議,鹿湖僧侶敲木魚示威。好心官老爺唔好咁懶啦,好好諗辦法解決問題,政府總部唔係骨灰龕場,唔可以放置大量死人頭㗎!
 
標籤 :
分類 :
評論 :
    回覆 :
    姓名 : *
    內容 : *
    驗證碼 : *
    分享到